Årsmeldingar for driftsåret 2025

Agenda til årsmøte på Eikum hotell – måndag 9.februar 2026 – kl 1900

Årsmøtet er delt i 2 avdelingar, der første delen av møtet vert ei markering av bokprosjektet: «Gards- og ættesoge i Luster», der siste bindet i prosjektet, Bind XII-Solvorn 2, no er utgitt. Markering etter eige opplegg.

Etter avslutta første del av møtet, vert det enkel servering, før me går over til årsmøte for Hafslo sogelag.

SAKLISTE TIL ÅRSMØTE:

1. Opning / velkomst ved leiar
2. Val av møteleiar og referent
3. Godkjenning av innkalling
4. Godkjenning av sakliste
5. Innmelde saker. Saker frå Styret:
   • Spørsmål om etablering av fotonemnd i Laget.
     Forslag til vedtak: Årsmøte gir Styret fullmakt til å etablere fotonemnd, og føreta val av medlemar i nemnda.
   • Innhenta tilbod på reparasjon av taket på fjøsen på Fluga.
     Forslag til vedtak: Årsmøte gir Styret fullmakt til å innhenta tilbod, og utføre reparasjon på fjøstaket på Fluga.
   • Få vurdert tilstanden på taket på husmannsstova.
     Forslag til vedtak: Årsmøte gir Styret fullmakt til å få vurdert tilstanden på taket på husmannsstova, og eventuelt innhenta tilbod på reparasjon og utføre denne.
6. Val av to medlemar til å skriva under møteboka
7. Årsmeldingar frå laget og nemnder, med arbeidsplanar for 2026
8. Revidert rekneskap og budsjett
9. Fastsetting av kontingent for 2027.
   Forslag til vedtak: Kontingent for einkelt medlemsskap, kr 250,- frå 2027. Tilleggskontingent for husstandsmedlem kr 150,- pr medlem, frå 2027.
10. Val
11. Orientering frå Styret v/Aamund, om heimesida til laget, vedlikehald- og oppdatering av denne, samt filmar frå «Kulturen i Naturen».
12. Avslutning.

Årsmelding driftsåret 2025.

Samansetning av styre:
Leiar Svein Solheim På val 2027
Nestleiar Aamund Lomheim Bremer På val 2026
Kasserar Gerd Westby På val 2027
Sekretær Aud Marit Hilleren På val 2026
Styremedlem Kristoffer Melheim På val 2026

Varamedlemer til styre:
Johannes Fredheim Finstad 1.varamedlem
Tordis Skjerdal Rauboti 2.varamedlem
Terje Melheim 3.varamedlem

Flugenemnda:
Leiar Olav Grøteig På val 2026
Medlem Svein Øygard På val 2026
Medlem Bjørg Marie Dalaker På val 2027
Medlem Helge Stølen På val 2027
Medlem Gerd Holen Lomheim På val 2026

Varamedlemar til Flugenemnda:
Ingrun Søhoel
Sølve Lomheim
Kari Beheim Karlsen
Marit Johansen

Bygdeboknemnda:
Leiar Per Jørgen Loen
Medlem Magnar Høyum
Medlem Leif Hammaren

Stuaflåtringen:
Leiar Ole Johnny Sie På val 2027
Medlem Edin Lingjerde På val 2026
Medlem Oddmund Sie På val 2027

Modvanemnda:
Leiar Tor Bremer På val 2027
Medlem Sverre Norheim På val 2026
Medlem Odd Øygard På val 2027

Revisorar:
Jon Sterri På val 2026
Jan Arne Finstad På val 2027

Valnemnd:
Eirik Hoem
Jon Ove Lomheim
Henny Eikum Roterud

Æresmedlemar i Hafslo sogelag:
Kåre Alme, utnemnd til æresmedlem av årsmøte i 2017.
Johannes Bremer Lomheim, utnemnd til æresmedlem av årsmøte i 2019.
Olav Kjell Lomheim, utnemnd til æresmedlem av årsmøte i 2023.

Årsmøte for driftsåret 2024, vart halde på Eikum hotell, 5.februar 2025.

Leiaren ynskte velkomen, med ei spesiell helsing til æresmedlemane Kåre og Johannes.
Det var 53 frammøtte.
Leiar gjekk gjennom oppsett sakliste, som vart godkjend utan merknader frå årsmøte.
Leiar vart vald til møteleiar, og sekretæren vald til referent.
Medlemane Hans Moseng og Henny Eikum Roterud vart valde til å skriva under møteboka.

Det var innmeld ei sak til årsmøte frå Styret, som gjekk på vurdering av vidare medlemskap i Landslaget for lokalhistorie. Styret hadde forslag om å seie opp medlemsskapet, då ein såg liten nytteverdi i å stå som medlem. Vedtak: Sogelaget melder seg ut av Landslaget for lokalhistorie.

Årsmelding frå styret og nemnder, med arbeidsplanar.

Årsmelding frå styret v/leiar, og rapport frå filmprosjektet «Kulturen i Naturen»
Årsmelding frå Flugenemnda v/ Olav
Årsmelding frå Stuaflåtringen v/ Svein (Ole Johnny hadde meldt forfall)
Årsmelding frå Bygdeboknemnda v/ Per Jørgen
Årsmelding frå Kvalenprosjektet v/ Per Jørgen
Årsmelding frå Modvanemnda v/ Svein (Tor hadde forfall)
Revidert rekneskap v/ Gerd

Alt framlagt vart godkjent utan merknader frå årsmøte.
Servering med karbonadar og blautkake, samtidig som ein selde loddar til utlodding av gevinstar gitt av bedrifter i området.
Til slutt var det vist film frå prosjektet: «Kulturen i Naturen» – om «Livet til Lustringar – før oss».
Møte slutt kl 2240.

Referent: Aud Marit Hilleren

ÅRSMELDING 2025

Styret

Det er i arbeidsåret halde 6 styremøter, og handsama 38 bokførde saker. Styremøta er haldne på møterom til Hafslo Barne- og ungdomsskule. Takk til adm. på skulen, ved rektor Hilde Holte Selland, for positiv hjelp.
I nokre av styremøta, har og nemndleiarane vore innkalla, dette for å halde styret oppdatert på aktivitetane i gruppene.

Av saker som har vore handsama av styret:

• Evaluering av årsmøte 2025.
• Rapportering til Kommunen vedkomande kulturmidlar.
• Søknad om kulturmidlar for 2025.
• Søknad om kulturtilskot til «Kulturen i Naturen».
• Søknad om gåvetildeling frå Banken.
• Diverse søknader om tilskot til «Kvalenprosjektet».
• Foredrag på Jostedal hotell v/Terje Hasle Joranger, 18.3., arr. Jostedal historielag.
• Møte vedk. Fredsmarkering. Arrangement ved Bautan, Solvorn kyrkje, 8.mai v/Ordføraren.
• Opplegg for fellestur til Klibberseggi, 19.juni, Kristoffer Melheim guide. Det var med 11 deltakarar.
• «Kvalenprosjektet», gjennomgang/status av rekneskap for hovudhuset.
• Slåttedag på Stuaflåten 5.juni.
• Måling av husmannsstova på Fluga, innvendig. Nils H Skjerven innleigd til arbeidet.
• Utleige av husmannsstova til regionsmøte i Lions 10.juni.
• Avtale med Tommy Stein om leige av geiter til nedbeiting på Jarnaldergarden på Modvo.
• Arrangement på slåttedagen 28.juni, og markering av Utvandrarjubileet, v/Svein Solheim og Sylfest Lomheim.
• Status/framdrift i Bygdebokprosjektet, Bind XII, v/Per Jørgen.
• Orientering v/Svein, om filmprosjektet «Kulturen i Naturen».
• Arkivet tilbake frå lageret i Gaupne.
• Planlegging av årsmøte, delt møte med markering og sluttføring av Bind XII-Solvorn 2.
• Siste styremøte før årsmøte med gjennomgang av årsmeldingar, rekneskap og orientering frå valnemnda.

Aktivitetar i arbeidsåret 2025

Når det gjeld aktivitetane som laget har hatt i arbeidsåret, viser me til årsmeldingane frå nemndene.

Kulturen i Naturen

Filmprosjektet, som har vore eit samarbeidsprosjekt mellom frivillige organisasjonar: Hafslo sogelag, (som representant for sogelaga i Luster), Folkeakademiet i Luster og Luster kommune.

I arbeidsgruppa har desse vore med: Mary Åsen (Folkeakademiet i Luster), Svein Solheim (Hafslo sogelag), Odd Atle Stegegjerde (Luster kommune), Erling Bjørnetun (Luster kommune).
Teknisk medarbeidar har vore Karl Stefan Åberg.
Rekneskapsføring, tilskots-/lånesøknader har Hafslo sogelag følgd opp.

Målsettinga med prosjektet er å styrke kartleggingsarbeidet på tema som har lokalhistorisk verdi, og formidle kunnskap til fleire aldersgrupper.

Det er produsert 13 filmar, som alle ligg ute på Kommunen si heimeside og på You Tube. Det er innkjøpt ein del utstyr brukt til filminga, utstyr som no vert overteke av kommunen, etter eigen avtale. Utstyret vert lagra og ivareteke på ATS, og er tenkt for vidare bruk til m. a. lag og organisasjonar i Kommunen, no når filmprosjektet førebels er avslutta. Det har vore dialog med kommunikasjonsavdelinga i Kommunen, som er med på å sikre ein trygg overgang. Ikkje minst går dette på opplæring på bruk av utstyret til nye brukarar.

Det har vore god økonomistyring av prosjektet, med god støtte frå:

• Luster kommune
• Luster Sparebank
• Vestland fylkeskommune
• Digital Etikett AS
• Statkraft AS
• Luster Energiverk AS
• Eigenfinansiering og eigeninnsats

Heimesida til laget

Aamund Lomheim Bremer er ansvarleg for å halde heimesida a jour. Her ligg inne artiklar,  historia og gamle blider m.m. Me oppfordrar alle å koma med innspel og forslag som kan vera av interesse å ta inn på heimesida.

Her finn ein og generell informasjon om laget, og aktivitetar som er planlagde.

Aktivitetsplanar 2026

Viser til årsplanar frå nemndene

• Søknader om fullfinansiering av gjenståande til «Kvalenprosjektet»
• Fullføring av prosjekt 2 og 3 i «Kvalenprosjektet», når det er gitt tilsagn som gir   fullfinansiering.
• Kostnadsoverslag og reparasjon av taket på fjøsen. Taket på husmannsstova må og sjekkast ut.
• Planlegge sti til Jarnaldergarden frå Skisenteret, i samråd med grunneigar.

Takk for støtte og godt samarbeid

Styret vil takke for god økonomisk støtte gjennom året. Takk til Luster kommune for tilskotsmidlar og midlar til kulturvern, og forskottering av mva-refusjon til «Kulturen i Naturen». Ekstra takk til Kulturavdelinga i Kommunen, v/Erling Bjørnetun. Han har gjennom mange år vore ein positiv og viktig bidragsytar for lag og organisasjonar i Kommunen. Hans fagkunnskap og hjelpande hand når m.a.  søknader om spelemidlar skulle handsamast, har tilført oss viktige bidrag, og gitt oss flotte og gode anlegg. Me er mange som kjem til å sakna Erling, når han no sluttar i jobben. Gratulerar med ein vel fortent Kulturpris 2025.

Takk til Luster Sparebank for den årlege gåva,  for støtte til prosjektet «Kulturen i Naturen» og  tildelingar til «Kvalenprosjektet». Takk for økonomisk støtte frå Digital Etikett AS, Luster Energiverk AS og Statkraft AS.

Takk til våre sponsorar for støtte til annonsering og gåver.

Takk til Hafslo Barne- og ungdomsskule for hjelp med møterom.

Takk for godt samarbeid i styret og med nemndene, og det gode arbeidet som nemndene gjer.

Vil du vera med å støtte Hafslo sogelag ved å bli medlem, VIPPS 547657.

Sjå info og artiklar på heimesida vår.

Hafslo sogelag

Styret

Svein Solheim, leiar

---

Årsmelding for Flugenemnda 2025

Nemnda har hatt 4 møter – tillegg mange dugnadsdagar.

Medlemer i nemnda: Leiar Olav Grøteig, Svein Øygard, Gerd Holen Lomheim; Bjørg Marie Dalaker, Helge Stølen Vara: Ingrun Søhoel, Sølve Lomheim, Marit Johansen

Ulike arbeidsoppgåver/aktivitetar som har vore gjort i 2025:

Slåttedag 28. juni.
I år vart det satt opp ei ny troehes som vi fekk Kristoffer Melheim og Kjell Magne Hillestad til å lage etter den gamle metoden. Dei gjorde ein flott innsats , slik at den stod klar til slåttedagen.

Som tidlegare år var det svært vellukka i år og. Mange kom innom og stemninga var god. I år blei det meste av arrangementet lagt til stallen . Det blei greitt å gjennomføre når alt var samla og dei som kom kunne sjå dei som jobba ute og sitje inne å nyte kaffi og graut og høyre på dei som bidrog med talar og informasjon . Sjølve arbeidet med slåtten gjekk fint, mange som deltok og bidrog i arbeidet.

Utvandrarjubileumet blei markert i programmet med foredrag av Svein Solheim og i tillegg hadde vi eit kåseri med Sylfest Lomheim.

I år vart det vanskeleg å skaffe hestar til riding – så det falt ut av programmet.

Medlemane i nemnda er flinke til å stille opp, samt nokre andre frivillige (alltid lett å spørje om litt hjelp) – så gjennomføringa gjekk fint.

I år blei det eit overskot av arrangementet på kr. 3.333 og det er vi godt fornøgd med.

Skulebesøk av 3. klasse
No har skulen landa på eit opplegg for 3. klasse som ei gruppe som det er greitt å lage eit opplegg for, slik at dette er no blitt ein fin tradisjon og eit godt samarbeid med skulen.

I år var det besøk på skomakarverkstaden, omvisning i kjøken, kammerset, stabburet, stallen og dei fekk prøve seg med ljå – som var svært populært. Besøket vart gjennomført av Svein Solheim, Jon Ove Lomheim, Ingrun Søhoel og Gerd Holen Lomheim.

Grønsakhagen
Det er og blitt ein fin tradisjon og eit samarbeid med ungdomsskulen der Ivar Garpestader er ivrig og flink til å få med elevane. I tillegg til Harald Hess og Helge Stølen gjort ein god jobb i lag med skulen slik at elevane får sjå og prøve å så og hauste ulike grønsaker.

Besøk av dagsenteret ved Hafslo Omsorgssenter
Som tidlegare vart dette eit vellukka besøk. I år var det 10 frå Omsorgssenteret – pluss fleire av personalet. Etter omvisninga i stallen, fekk dei som klarte det – besøke hovudhuset. Så vart det servert kaffi, krumkaker og lefse ute i det fri – for dette vi var ein av soldagane i juni.

Lions fekk leige lokalet 10 . juni til eit regionmøte.

Andre besøk.
Fleire grupper/familiar har vore innom Fluga og hatt omvisning. Bl.a. i forbindelse
med amrerikabesøk.

Stabburet.
Det vart montert ny trapp – den var ei gåve frå Sie Sag. I tillegg vart dørene ordna og det er rydda innvendig og støvsugd.

Stovehuset.
Stova er no måla innvendig – både tak og vegger – flott abeid utført av Nils Skjerven. Nils har og skrapt, børsta, kitta og måla vindaugene utvendig.

Alle 4 veggene på huset er skrapt, vaska og måla 2 strøk. Dette er gjort på dugnad. Gjenståande arbeid utvendig er maling av arken og takrenner mot tunet.

Det vert og vaska og rydda i starten av sesongen inne – i stova, kjøkken og kammerset.

Informasjonstavle.
Det er oppsett informasjonstavle ved innkøyringa til Fluga.

Området ute.
Som vanleg har vi dyktige folk – spesielt Svein Ø som tek seg av graset slik at det ser velstelt ut heile sommaren.

Stormskade.
Under stormen Amy 4. oktober bles fleire takplater av fjøstaket. Harald Hess, Edin Lingjerde og Svein Solheim remonterte platene, men lite feste gjer at platene ligg relativt laust. Må vurdere utbetring av taket.

Dugnad på Fluga.
I løpet av sesongen er det lagt ned mange dugnadstimar på Fluga – vanskelig å berekne nøyaktig med vi anslår at det er godt over 200 timar av medlemane og andre.

Aktivitetsplan for 2026 for Flugenemnda

Tiltak på hovudhuset

• Montere takrenne – få tak i passende dimensjon som står til huset.
• Listing av vindaugene i tunet.
• Vårreingjering inne slik vi pleier å gjer kvart år.
• Maling av arken.
• Sjekke taket av huset.

Fjøsen:

• Venter på overslag over kva som må gjerast på fjøstaket. Der leiger ein inn folk til jobben, men i tillegg legg vi inn dugnad på forfallande arbeid, når jobben skal utførast.

Kjøkkenhagen:

• I samarbeid med ungdomsskulen legg ein til rette for grønnsaker som elevane kan stelle gjennom sesongen. Om hausten haustar dei og nyttar seg av grønnsakene på skulen.

Besøk på Fluga:

• Legg til rette for besøk av 3. klasse i lag med lærarane på barnesteget.
• Vi vil i tillegg ta kontakt med skulane i Solvorn, Veitastrond og Indre Hafslo om dei kan tenkje seg å vere med på eit slikt opplegg.
• Besøk av Dagssenteret ved Hafslo Omsorgssenter og i tillegg dei som bur i leiligheter ved Omsorgssenteret og evt. heimebuande.

Slåttedag 27. juni 2026

• Vi brukar stallen som base for arrangementet sidan vi fekk god erfaring med det i 2025.
• Slåttedag med slått, sal av rømmegraut, kaffi og kaker – loddsal.
• Omvisning i hovudhuset eit par gonger i løpet av dagen.

I tillegg slår vi graset rundt eigendomen når det er behov og gjer anna forfallande arbeid som det skulle vere behov for.

---

Årsmelding Stuaflåtringen 2025

Styret dette året:
Ole Johnny Sie – leiar
Oddmund Sie- styremedlem
Edin Lingjerde – styremedlem

5. juni hadde me slåttedag med 10 deltakarar.

10. august var eg nede og slo håi rundt husi og tok or hesi.

16. oktober var me 3 i styret nedover og rydda stien for vindfall etter uveret Amy.
Så sette me innatt glasruta i stova.

Elles har det vore lite besøk dette året.

For Stuaflåtringen, Ole Johnny Sie.

---

Årsmelding for Modvanemnda 2025

Modvanemnda hadde i 2025 fylgjande samansetting:
Tor Bremer
Odd Øygard
Sverre Norheim.

Sommeren 2025 var geitene tilbake på Modvo. Frå 1.juni beita 15 geiter der. Som forventa gjorde dei ein framifrå jobb. I tillegg til geitene sitt arbeid, hadde Modvanemnda ansvaret for rydding av grovare vegetasjon, ettersyn av gjerdet og halde området ryddig.

Nemnda vil også i år minna om at det er ynskjeleg å få utarbeidd ein ny skødselsavtale for området. Ein avtale som i større grad opnar opp for ei bedre tilrettelegging for besøkande . Dette gjeld både skilting fram til området og diverse fasilitetar. Til dømes har dei siste utgravingane funne spor etter menneskje som går 2000 år lenger tilbake i historien, til bronsealderen. Dette bør dokumenterast og opplysast om på plansjene i området. Kanskje
liknande plansjar også skulle vore på plass ved Sogn skisenter?

Planane for etablering av ein gangsti frå Sogn skisenter fram til gravfunna er ein god start for å utvikle området.

For Modvanemnda
Tor Bremer

---

Årsmelding 2025 – Bygdeboknemnda

Bygdeboknemnda har i 2025 vore samansett slik:
Per Jørgen Loen – leiar
Leif Johan Hamaren
Magnar Høyum

I 2017 vart Bygdebok for Luster – Band XI- Solvorn I – ferdigstilt og utgjeven. Det som sto att før serien var komplett, var Band XII – Solvorn II. Dette bandet omhandlar 4 gardsnummer , 182 Kroken, 183 Urnes, 184 Kinserdal og 185 Åsen.

Lars E. Øyane som hadde ansvaret for ættesoga, var heldigvis ferdig med manuset for den før han døydde i 2022. Berre små oppdateringar stod att. Terje Mikael Hasle Joranger har hatt ansvaret for gards- og grendesoga, og å flette manuset saman med ættesoga. Han har også gjort dei siste oppdateringane av ættesoga.

Den 22.12. 2024 fekk Erling Bjørnethun, Leif Johan Hamaren og Per Jørgen Loen tilsendt manuset frå Terje Joranger. I januar og februar las alle tre korrektur på manuset kvar for seg, og merka av feil og manglar vi fann. I mars og april sat vi saman i 4 heile dagar på Gaupnetunet for å samordne dei merknadene vi hadde. Korrekturen var ferdig frå vår side til mai-25. På grunn av tilgang til ny informasjon måtte Terje Joranger skrive om innleiinga om Urnes stavkyrkje. Dette førte til at vi miste plassen i produksjonskøen.

Det endelege manuset vart sendt til trykkeriet i september etter at Erling Bjørnethun hadde lese den siste korrekturen. Planen var at boka skulle vere klar til ca. 1. desember. Men eit nytt problem oppstod, det synte seg svært vanskeleg å oppdrive rett farge på omslaget til boka (lik den på dei andre 11 banda). Etter sterkt press frå Erling løyste det seg til slutt, og fredag 19 desember vart bøkene leverte på rådhuset i Gaupne.

Luster kommune har gjort avtale med «Lika» på Pyramiden om å selje boka, og boka vart lagt ut for sal med ein gong. Om ein ønskjer å kjøpe fleire bøker (tidlegare band),må ein venda seg til servicetorget.

Dagen etter levering møtte leiar i sogelaget, Svein Solheim, Erling Bjørnethun og heile bygdeboknemnda i Gaupne for fotografering og presentasjon av boka. Dette blei lagt ut på kommunen si heimeside og i sosiale media. Mange klarte nok i siste liten å skaffe seg boka til jul.

Bygdeboknemnda er svært glade for at arbeidet med band VII – Solvorn II no er avslutta. Vi vil takke bygdebokskrivarane Lars E. Øyane ( som døydde i 2022) og Terje Mikael Hasle Joranger for svært godt samarbeid i alle dei åra dette omfattande arbeidet har gått føre seg. Ei stor takk også til Erling Bjørnethun i Luster kommune for godt samarbeid, stort engasjement og mykje dugnadsarbeid langt utover det jobben skulle tilseie. Han har vore med i heile prosessen frå Band I – Fortun sokn og fram til at band VII -Solvorn II no gjer serien komplett.

Vi takkar også alle informantar for god hjelp og stort tolmod når vi rett som det var måtte be om oppdateringar av nye opplysningar og oppdateringar.

Bygdeboknemnda takkar for seg.

Solvorn 20.01.2026

Per Jørgen Loen – leiar i nemnda

---

Årsrapport – Kvalenprosjektet 2025

Styret i Hafslo sogelag vedtok i møte 07.06.22, sak 24/22 at dei ynskjer å restaurere og ta vare på husmannsplassen Kvalen i Luster kommune. På årsmøtet i Hafslo sogelag i 2023 vart det oppnemnd ei arbeidsgruppe på 5 som skal arbeide vidare med prosjektet:

Per Jørgen Loen- leiar
Aamund Bremer
Ole Inge Skagen
Arne Kvalen
Per Ove Loen

Gruppa har hatt fleire møte i 2025, der ein har planlagt framdrift og dugnadsarbeid m.m.
Prosjektet har vore delt i 3 delprosjekt:

• Delprosjekt 1 – Naustloftet 2023/2024
• Delprosjekt 2: Hovudhuset 2024/2025
• Delprosjekt 3: «Vetlastova»/kårhuset 2025/2026

Parallelt ville ein jobba med å få på plass ny utedo og å få restaurert kaien.

Ein valde naustloftet som delprosjekt 1, sidan det var eit relativt enkelt bygg å restaurere, og mykje av arbeidet kunne utførast på dugnad. Restaureringsarbeidet der var ferdig i 2024, og ein ville ha ein plass å lagre utstyr og materialar under det vidare arbeidet i tillegg til å ha ein eigna kvileplass.

Målet med naustloftet var å få til utstilling med infoplakatar om historia til plassen. Plakatar om dei ulike aktivitetane i Kvalen er ferdig trykte, og vil bli hengt opp våren 2026. Vi har også fått samla ein del gjenstandar som knyter seg til aktivitetane, til utstilling. Naustloftet kanogså bli «klasserom» for grupper på besøk. Vi har fått bord og benker i gåve til bruk i «klasserommet»

Status for 2025.:

Målet for 2025 var å få restaurert hovudhuset – delprosjekt 2 – med ferdigstilling til markeringa av utvandrarjubileet i slutten av september.

Vi starta med synfaring og planlegging siste dagen i mars. Den 14. 4. hadde vi stor dugnad der det vart trekt 600 meter med plastslange ut til Kvalagjel. Slangen var gitt av ein privatperson. Dette sikrar vass-tilgang i Kvalen i heile sommarhalvåret. Same dagen kom det 4 sherpaer frå Stibyggjaren A/S og byrja med restaurering av grunnmuren på stovehuset. Dei avslutta arbeidet dagen etter og resultatet var imponerande.

I mai vart naustloftet klargjort for overnatting for snekkarane i Solvorn Laft og Bygg, og materialar var transporterte med båt til Kvalen og borne opp til huset, alt på dugnad. Det var mange turar med supplering av materialar utover sommaren.

Vindauga i huset var i svært dårleg forfatning og berre 2 av 7 kunne restaurerast og gjenbrukas. Vi var heldig å få kjøpt 5 gamle vindauge på Fagernes, som vi fekk henta hit. Desse måtte også restaurerast. Etter restaurering vart Nils Skjerven leigd til å måle glasa før montering. Arbeidet vart utført på verkstaden til Solvorn Laft og Bygg .

Sjølve restaureringsarbeidet med Solvorn Laft og Bygg starta siste veka i juni og heldt fram til midten av september, med ein lang pause i juli og august . Det var 3-4 snekkarar i sving, og dei overnatt på naustloftet når dei var der og jobba. Resultatet av arbeidet vart veldig bra, og tidsfristen som var sett til september vart halden.

Det har vore ein formidabel dugnadsinnsats også dette året, sjølv om snikkararbeidet måtte utførast av fagfolk. All rydding av materialar som vart rivne og ikkje kunne brukast om att vart gjort på dugnad. Innvendig rydding og vasking var like eins dugnadsarbeid. Største dugnadsinnsatsen har Arne Kvalen hatt med transport av innleigde folk, dugnadsfolk og materialar. Totalt er det utført 473 timar dugnad med praktisk arbeid, i tillegg kjem
«kontorarbeidet» med planlegging, søknader, rapportering m.m.

Utvandrarjubileum.

I 2025 var det 200 år sidan den første utvandringa til Amerika, med markering både nasjonalt og lokalt. Solvorn bygdalag og Hafslo sogelag bestemte seg for eit samarbeid om å markera dette jubileet i samband med «Strandsitjardagane» siste helga i september. Fredag 26.9. var det kulturkveld på Solvorn Oppvekstsenter med tema utvandring. Laurdag var det tradisjonell «Strandsitjardag» og søndag 28.9. ar det lagt opp til eit program med markering i Kvalen.

Sogelaget valde ei eiga nemnd med ansvar for arrangementet, Tordis Skjerdal Rauboti, Johannes Fredheim Finstad og Per Jørgen Loen. I samarbeid med Solvorn bygdelag vart det leigd inn tre veteranbåtar, M/S Atløy, M/S Arnafjord og M/B Tya, for å transportere deltakarane i markeringa til Kvalen.

Planen var at ein skulle gå i land i Kvalen, få informasjon og underhaldning og servering av tradisjonsmat, før ein avslutta med eit utvandrartablå, der ein familie skulle bli rodd ut til M/S Atløy for å utvandre. Det var ca. 100 påmelde til markeringa. Dessverre vart det for mykje vind i Kvalen til at båtane kunne leggje til land, så vi måtte
improvisere. Alle tre båtane la seg inntil kvarandre, og Svein Solheim orienterte om utvandrarjubileet. Per Jørgen fortalde litt om historia til Kvalen, og om kor mange som hadde utvandra frå Kvalen til Amerika.

Heldigvis hadde vi maten om bord i Atløy, så alle fekk servering av spekemat, flatbrød, heimebakte potetkaker, lefsekling og finsk mjød. Vi sakna kaffien, for kaffivatnet var kokt på grue på land, medan kaffien var om bord!!
Turen gjekk så tilbake til Solvorn, der resten av programmet vart gjennomført. Asbjørg Ormberg og Marit Elvekrok song salmar og songar i lokal tradisjon. Det var lotteri der alle gevinstane var gåver, fleire av dei med tilknyting til Kvalen. Til slutt kom familien som skulle utvandre ned på kaien, tok tårevått farvel med foreldre og bestemor og gjekk om bord i M/S Atløy. Ein rørande scene.

Økonomi.

Delprosjekt 2 hadde eit budsjett på kr 1.225.700 inklusiv verdien av dugnadsarbeid. Hafslo sogelag fekk totalt tilsegn om kr 800.000 til prosjektet. Rekneskapen syner at ein vil klare seg innfor budsjettet, sjølv om ein fekk litt avkorting av tilskotet frå Kulturminnefondet. Det er henta inn pris på piperehabilitering, og det vil ein klare innafor budsjettramma. Arbeidet vil bli utført våren 2026. Like eins vil utvendig måling av huset bli gjennomført til våren, men måling er innkjøpt og betalt.

Oppsummering

Det som var sett opp i aktivitetsplanen for 2025 er i all hovudsak gjennomført etter dei planlagde tidsfristane. PÅ grunn av vêrtilhøva i haust, måtte utvendig måling utsetjast til våren-26.

Prosjektet er fullfinansiert.

Aktivitetsplan 2026.

Delprosjekt 3- Vetlastova- er delvis finansiert, ein har fått nok midlar til den lafta delen av stova. Det vert jobba vidare med fullfinansiering.Det er ikkje noko av eksisterande materialar som kan nyttast, så det må laftast eit nytt bygg. Dette vil bli gjort på verkstaden til Solvorn Laft og bygg i løpet av vinteren. Sogelaget har fått hand om ein del brukt lafteplank som skal nyttast, resten blir nytt, men med brukte glas og dørar og gammalt bølgeblekk til tak.

Januar/februar:

• Solvorn Laft og Bygg laftar opp stova i verkstad.

April/Mai:

• Utstilling naustloftet
• Piperehabilitering
• Rydding, vasking og innvendig måling stovehuset
• Utvendig måling
• Riving av Vetlasova, rydding og klargjering av tomten.
• Snekre trapp opp frå kaien
• Setje opp infotavler

Juni:

• Slå marka rund husa (har fått gammal slåmaskin gratis)
• Montering av Vetlastova

Arbeidsgruppa er veldig fornøgde med arbeidet som er utført både av dei innleigde murarane, snekkarane og dugnadsfolket. Dei og alle som har bidrege økonomisk til prosjektet- offentlege og private bidragsytarar- fortener stor takk! Det er ein hugnad å jobbe med dette prosjektet når ein møter så mykje positivitet og velvilje!

For arbeidsgruppa

Per Jørgen Loen – leiar-